连诗雅拍拖不担心　周柏豪有心有力不急生

艺人#周柏豪#出席瑞士天梭表铜锣湾旗舰店揭幕礼，获品牌送赠一对情侣表，并担任一日店长。柏豪表示平日都有使用情侣物品，但并不会刻意去配搭，只是巧合撞衫：“我哋（与太太）各自买嘅，通常衫裤鞋表咁，就系咁先结到婚，如果喜好唔同好易会嗌交。（全部一样？）都要睇颜色配搭同场合嘅，要衬。但有时太衬戴同一顶帽就转一转色，费事咁衬，内心衬就得。。”

相比情侣装，柏豪比较接受亲子装：“屋企有啲BB我都会撞番佢哋着衫，但佢唔系我个仔，我都好锺意小朋友。（自己品牌会唔会考虑出亲子装？）有呀，但做小朋友衫啲物料要好安全，责任重大，仲研究紧，同埋我个品牌同其他牌子就有个联乘系列，喺观塘开咗铺头。而自己都忙做生意、拍剧、演唱会就嚟搞巡回。（几时会造人？）呢样之后再讲，随缘啦，做好自己工作先。（但生BB体能要好好？）相信我4、50岁体能都会好好，有Keep住做运动，举重都过百磅。（有心有力？）系，尚算年轻，做好工作先，畀啲时间。”

赞薛世恒有“亲切感”

此外，柏豪又认为同场出席的薛世恒跟好友袁伟豪有几分相似：“都真系几似，所以好有亲切感，两个都好Gentleman（绅士），身形高度都好似，都系正嘅！城中笋盘。（你就封咗盘啦？）有得吓倾嘅，有其他合作嘅。”

问有否关心好友连诗雅与音乐人徐浩的新恋情？柏豪说：“关心就有嘅，但惊关心变多心，最紧要佢自己开心。见佢都准备自己演唱会，觉得佢大个好多，以前就当佢系妹妹，依家成熟好多我都唔需要担心。（知佢有拖拍？）真系唔知，佢哋唔讲总有佢哋嘅原因，唔好畀压力佢哋，畀人影到出街咪出街，留畀佢哋自己答，大个仔大个女。”